هيك سرقونا.. بسليم سلام

ايام كتير، انا كابن بيروت، بمشي بالشوارع بالليل وبستغرب، كيف هيك مدينة صغيرة بالمساحة، بتجمع هيك تناقض بين ناس وناس..

كيف انا موظف، والدي تاجر، اخوتي كلهم بيشتغلوا، وبيتنا شقة عادية، سيارتنا عادية، ومصروفنا ع قدنا.

وكيف موظف بجهاز محاسبة أو ببلدية أو ب جمارك.. الخ معاشه ماكسيموم 5 ملاين ليرة، سيارته ب 40 الف دولار وشقته بمليون!

هيك أسئلة بتلاقي جواب، لما تعرف مثلا انو في مقاول اخذ 8.4 مليون دولار لـ يرمم نفق سليم سلام.. 

ولما تعرف انه ديوان المحاسبة وافق ع هيك تلزيم.. 

هيك بتصير حلقة الشك أكبر، من المقاول المقرب من فريق تيار المستقبل، للبلدية ورئيسها التابعين للمستقبل، لـ ديوان المحاسبة يلي معين من قبل ذات السلطة. 

نفق سليم سلام في عيوب جوهرية، مثلا هو مرتفع من الوسط، لهيك الدخان بيتجمع فيه، عقد ال 8.4 مليون للجهاد الهرب ما بيتضمن تسوية أرضه ل يصير جالس.. 

نفق سليم سلام بحسب الخبراء بدو حيط فصل بالنص، للأمان ب السواقة وبيساعد بخروج الدخان عبر الضغط، كمان عقد جهاد العرب ما بيتضمن هيك شي.. 

ونفق سليم سلام بحاجة لإيجاد مخرج منه للطواريء، للمشاة، مثلا درج يوصل من قلبه لفوق، كمان التزام جهاد العرب ما بيتضمن انشاء ولو سلم خشب! 

البلدية لما تسألها بتقول، هي الكلفة وافق عليها المجلس البلدي ومين؟ ما غيره، معالي الوزير المفدى نهاد المشنوق.. ومرقها ديوان المحاسبة.. 

كلفة شق وإنشاء نفق بشارة الخوري الجديد بالكامل مع تنوعاته  8 ملايين دولار.. كلفة تبليط وتغيير كم مروحة بسليم سلام 8.4 مليون دولار!! 

بلدية وديوان ووزير... هيك انسرقنا ب سليم سلام..

الموضوع التالي: جسر الكولا، والمال السايب..